Menejimenti ya Ofisi ya Mwandishi Mkuu wa Sheria (OCPD) imepata mafunzo maalum ya masuala ya ukaguzi na namna ya kutambua, kuchambua, kutathmini na kudhibiti vihatarishi katika eneo la kazi.

Mafunzo hayo yamefunguliwa na Kaimu Mwandishi Mkuu wa Sheria, Bi. Rehema Katuga mkoani Morogoro.

Akifungua mafunzo hayo Bi. Rehema amesema kuwa ukaguzi wa ndani ni jicho la taasisi katika kuangalia majukumu yanatekelezwa kwa mujibu wa kanuni za nchi.

"Ukaguzi wa ndani ni jicho ambalo linaangalia kama taasisi inatekeleza majukumu yake kwa kanuni za nchi ili kupata matokeo mazuri," amesema Bi. Rehema.

Kaimu Mwandishi Mkuu wa Sheria, ameendelea kwa kuitaka menejimenti na watumishi kuwapa ushirikiano kitengo cha ukaguzi wa ndani na kamati ya ukaguzi wa ndani.

"Tutoe ushirikiano wa kutosha kwa kamati na kitengo cha ukaguzi kwani wanahakikisha OCPD inatekeleza majukumu yake kwa ufanisi, tunaamini mtatusaidia sana kwa yale ambayo hatujayaona, kuweni huru kutushauri na sisi tutayapokea," ameeleza Kaimu Mwandishi Mkuu wa Sheria.

Bi. Katuga ameendelea kwa kusema kuwa Serikali inategemea sana Ofisi katika kuandika Sheria fasaha na zinazotekelezeka.

"Kama ofisi tunategemewa sana na serikali kwani hakuna jambo linalofanyika nchini bila sheria hivyo ni wajibu wetu kuhakikisha imani tunayopewa na serikali inatimia kwa kutoa sheria fasaha," ameongeza Bi. Rehema.

Mafunzo haya ni ya siku mbili ambayo yataambatana na uzinduzi wa kamati ya ukaguzi ya OCPD.